O Noso Deporte

Recorta distancias o xuvenil da SD Compostela coa cabeza

O seu regreso á senda triunfal permítelle achegarse aos primeiros.

O regreso á senda triunfal do Xuvenil A na matinal do domingo destaca nunha xornada na que só se sumaron tres vitorias e un empate en dez encontros. Ademais dos maiores da base, tamén sumaron tres puntos o Infantil B e o Biberón.

En primeiro lugar, o Zona Vella volveu sumar outro empate, e xa van tres seguidos, na súa visita ao Deixebre. O filial tentouno de todos os modos, pero do mesmo xeito que fai quince días, non foi capaz de derrubar o armazón defensivo rival.

Mellores novas recibiu o Xuvenil A, capaz de vencer lonxe do seu feudo, recuperando sensacións e recortando cos primeiros clasificados. A sete puntos do segundo, a falta doutras tantas xornadas, os nosos soñan cun gran tirón final que os suba na táboa.

De momento, a semana preséntase máis positiva despois de superar por 0-2 ao Atlético Arteixo. Aos 25 minutos, os nosos puxéronse en vantaxe mediante un gol en propia porta, a cal ampliarían no 74 por mediación de Juan Amigo.

Chamou a atención en cadetes, a primeira derrota da tempada do A. Os branquiazuis perderon a súa imbatibilidade ao caer 3-0 contra o CD Conxo, terceiro clasificado. Nun partido moi pechado, decidiu o hat trick de Iker nos últimos instantes. Marcou o primeiro no 74 e os outros dous no desconto, cun Compos á desesperada. Con todo, os resultados favorecéronlle, xa que o segundo, o Amio, empatou e mantén oito puntos de renda. Mesma sorte tivo o Cadete B, que tras empatar contra o líder, perdeu por 0-2 contra o Xuventude Oroso, nun encontro decidido no cuarto de hora final.

En infantís, foi unha fin de semana cargada de goles. Por unha banda, o Infantil A perdeu na súa visita ao CD Conxo por 6-3, sendo Yago Lois, Álvaro Espasandín e Antonio Otero os goleadores.

Polo outro, o Infantil B ascendeu á cuarta posición ao superar ao EF Boquixón, o seu inmediato perseguidor, 4-5. Valentino Becerra e Jorge Vázquez, con senllos dobretes, e Anxo Olveira, fixeron
posible a remontada no campo do Forte.

En fútbol 8, a xornada acurtada, con tan só tres partidos, non tivo uns resultados favorables, xa que o Alevín A caeu contra o Arzúa por 1-5, o Alevín B 0-3 ante o Peleteiro e o Benxamín B na visita do Bertamiráns, conxunto que se proclamou campión de liga neste duelo.

Por último, o Biberón de Fútbol sala, a falta de que debute o de fútbol 8, gañou no seu partido contra o Calo e marcha segundo.